DENUNCIATIO REGIS CORONATI A. 1649.
PRAWA Y KONSTYTUCYE ZA PANOWANIA JANA KAZIMIERZA.
DENUNCIATIO REGIS CORONATI JOANNIS CASIMIRI.
JOANNES CASIMIRUS Dei gratia Rex Poloniae, Magnus Dux Lithuaniae, Russiae, Prussiae, Masoviae, Samogitiae, Livoniae, Smolensciae, Czerniechoviaeque, necnon Svecorum, Gottorum, Vandalorumque haereditarius Rex.
Omnibus in universum Regni nostri Ducibus, Principibus, Comitibus, Baronibus, spiritualibus et saecularibus; Archiepiscopis, Episcopis, Palatinis, Castellanis, Capitaneis, Dignitarijs, Officialibus, Judicibus, ac eorum Vicesgerentibus, tum Proconsulibus, Consulibus, ac quibusvis alijs Regni nostri Magistratibus, aut eorum loca tenentibus: caeterisque cujuscunque conditionis hominibus, ad quorum notitiam hae nostrae pervenerint literae, sincere, et fideliter Nobis dilectis, gratiam nostram Regiam.
Sincere, et fideliter Nobis dilecti: ubi per summam fatorum inclementiam, difficillimo Reipublicae tempore, Serenissimus Rex Frater noster, Divae olim memoriae, Vladislas Quartus, terris ereptus, coeloque assertus est: magnum hac in parte Regni totius Poloniae, Magnique D. Lithv., erga Jagellonianum sanguinem nostrum agnovimus propensionis et gratitudinis argumentum, quod de communi consensu, summaque omnium Ordinum concordia, Nobis deferre inclyti Regni istius diadema voluerint: hinc posteaquam faventibus superis, liberisque universae Reipublicae suffragijs, more ac instituto Majorum, Comitijs Electionis Varsaviae mense Novembri anni proxime elapsi, rite peractis, electi et renunciati essemus, et praestito ibidem a Nobis in Ecclesia Collegiata Divi Joannis Baptistae solenni juramento, publicum Electionis diploma, et decretum accepissemus: reliquum Nobis erat, ut ad praefixum tempus inaugurationis nostrae Cracoviam iter maturaremus; quo Deo juvante, decimaquarta mensis ejusdem pervenimus. Ubi persolutis die decimaquinta Januarij solenni ritu Serenissimo Fratri nostro exequijs, proximo die Dominico, qui erat decimus septimus Januarij, in basilica Divi Stanislai arcis Cracoviensis, praemisso et praestito prius ante altare majus, in manibus Reverendissimi Domini Mathiae Łubieński, Archiepiscopi Gnesnensis, Primatis, Primique Principis Regni, ex concepta formula, de servandis, et manutenendis juribus, privilegijs, libertatibus ecclesiasticis et saecularibus, privatis et publicis, Regni, et M. D. Lit. juramento, Sacro Oleo uncti, et Regio diademate, quo Reges Poloniae ab antiquissimo tempore coronari solent, ritu Catholico Romano, assistente Nuncio Apostolico, adstante et inspectante Senatu, Terrarumque Nuntijs, ac plurimis dignitarijs, officialibus, et incolis Regni, et M. D. Lit., ab eodem Reverendissimo Archiepiscopo Regni insigniti, et coronati sumus. Qua quidem Coronatione, et inauguratione nostra, rite ac legitime peracta, jam quod Nobis, ac Reipublicae, universoque orbi Christiano, faustum ac salutare sit Deo auspice, gubernacula Regni capessivimus, et Nos regimini populorum Divinitus tradito accinximus; recepto jam a praesentibus Dominis Senatoribus, alijsque dignitarijs et officialibus Regni et M. D. Lit. tum et civitate Cracovien: compluribusque alijs fidelitatis juramento. Quod ad notitiam omnium et singulorum deducendo Sync: et Fid: vestras, q…
Georgius de Tęczyn Ossoliński, Supremus Regni Cancellarius.
Ad mandatum S. Regiae Majestatis proprium.